چچی کے عشق میں بھتیجے نے کردیا چچا کا قتل

 

ہم بھارت: کانپور دیہات میں چچی کے عشق میں بھتیجے نے چچا کا بے رحمانہ قتل کر دیا

اتر پردیش کے کانپور دیہات سے ایک سنسنی خیز واقعہ سامنے آیا ہے، جہاں چچی سے محبت کے باعث ایک بھتیجے نے اس کے اشارے پر اپنے ہی چچا کو بے دردی سے قتل کر دیا۔ پولیس نے شک کی بنیاد پر دونوں کو حراست میں لیا، جہاں پوچھ گچھ کے دوران دونوں نے اپنا جرم قبول کر لیا۔

یہ واقعہ بھوگنی پور کوتوالی حلقہ کے امراؤدھا قصبہ کا ہے۔ یہاں امراؤدھا کے کٹرا محلہ کے رہائشی، 40 سالہ ٹرک ڈرائیور محمد کلیم کو 27 دسمبر کی رات گلا کاٹ کر قتل کر دیا گیا تھا۔ اگلے دن ان کی لاش گھر کے اندر چارپائی پر پڑی ملی۔ اطلاع ملنے پر پولیس موقع پر پہنچی تو متوفی کی اہلیہ شمع پروین نے بتایا کہ وہ خاندانی چچا نور محمد کی بیٹی کی شادی کے سلسلے میں جاری تقاریب میں گئی ہوئی تھیں۔ پولیس نے ابتدائی طور پر خودکشی کا شبہ ظاہر کرتے ہوئے لاش کو پوسٹ مارٹم کے لیے بھیج دیا تھا۔

تاہم تفتیش کے دوران یہ اشارے ملے کہ قتل میں متوفی کے قریبی رشتہ دار ہی ملوث ہیں۔ اس کے بعد متوفی کے بھائی شکیل نے ہفتے کے روز نامعلوم افراد کے خلاف قتل کا مقدمہ درج کرایا۔ پولیس نے محمد کلیم کی اہلیہ شمع پروین اور متوفی کے بھتیجے سمر شمیم عرف چاند بابو کو حراست میں لے کر پوچھ گچھ کی۔ ابتدا میں دونوں ٹال مٹول کرتے رہے، لیکن پولیس کی سختی کے بعد دونوں نے اپنا جرم قبول کر لیا۔

پوچھ گچھ میں شمع پروین نے بتایا کہ ان کی شادی تیرہ سال قبل ہوئی تھی اور اس دوران ان کے تین بچے پیدا ہوئے، تاہم تینوں بچوں کی موت کے بعد ان کے شوہر شراب نوشی کے عادی ہو گئے تھے۔ تیسرے بچے کے علاج کے لیے انہوں نے اپنے بھتیجے چاند بابو سے رقم ادھار لی تھی۔ چاند بابو ممبئی میں رہ کر ویلڈنگ کا کام کرتا تھا اور وقتاً فوقتاً امراؤدھا آتا جاتا تھا۔ رقم کے لین دین کے دوران فون پر بات چیت بڑھتی گئی اور دونوں کے درمیان محبت ہو گئی۔

جب محمد کلیم کو اس تعلق کا علم ہوا تو وہ اس کی مخالفت کرنے لگا۔ اس پر شمع پروین اور چاند بابو نے مل کر اسے راستے سے ہٹانے کی منصوبہ بندی کر لی۔ خاندان میں شادی کی تقاریب کے دوران انہیں موقع ملا اور شمع پروین کے اشارے پر چاند بابو نے محمد کلیم کا گلا کاٹ کر قتل کر دیا۔

سی او بھوگنی پور سنجے ورما نے بتایا کہ پوچھ گچھ کے بعد دونوں ملزمان کا چالان عدالت میں پیش کر دیا گیا ہے۔